ဟောလိဝုဒ်ထိရောက်ခဲ့သော မြန်မာမင်းသမီး ဝင်းမင်းသန်း

ဘဝမှာ ရုပ်ရှင်တစ်ကားပဲ ရိုက်ဖူးပြီး၊ အဲဒီတစ်ကားတည်းနဲ့ နာမည်ကျော် ရုပ်ရှင်မင်းသမီး ဖြစ်သွားပြီး ဟောလိဝုဒ် ရပ်ဝန်းထိ ခြေဆန့်နိုင်တဲ့သူ၊ အဲဒီအောင်မြင်မှု မှန်သမျှကို ယစ်မူးခြင်းမရှိ ခဝါချနိုင်သူ ဆိုတာ ရှိတော့ရှိနိုင်ပေမဲ့ ရှားပါလိမ့်မယ်။ အဲဒီလို ရှားရှားပါးပါးထဲ မြန်မာနိုင်ငံက ရုပ်ရှင်မင်းသမီး ဝင်းမင်းသန်း ပါခဲ့တယ်ဆိုတာ ဂုဏ်ယူတတ်မယ်ဆိုရင် အင်မတန် ဝမ်းမြောက်စရာ ကောင်းပါတယ်။

ဒါပေမဲ့ ဟောလိဝုဒ်ထိ ရောက်ခဲ့တဲ့ မြန်မာမင်းသမီး ဝင်းမင်းသန်းကို ဒီဘက်ခေတ် မျိုးဆက်တွေထဲ သိတဲ့သူဆိုတာ တော်တော်လေးကို နည်းသွားပါပြီ။ ပြောရမယ်ဆိုရင် မေ့သလောက်တောင် ဖြစ်နေပါပြီ။ မြန်မာမင်းသမီးနဲ့ ဟောလိဝုဒ်ဆိုတာ ဘယ်လိုမှ ဆက်စပ်မှုမရှိဘူးလို့တောင် ထင်ချင် ထင်ကြမှာပါ။ ဒါဟာလည်း သူတို့တွေရဲ့ အပြစ်တော့ မဟုတ်ပါဘူး။ သူတို့ လက်ရှိတွေ့မြင်နေရတဲ့ မြန်မာ့ရုပ်ရှင်အဆင့်အတန်းက ဒီလို ရင်ဘောင်တန်းနိုင်စရာ အခြေအနေမျိုးမှ မဟုတ်တာ။ ဒါကြောင့် တစ်ခေတ်တစ်ခါက လျှမ်းလျှမ်းတောက်ခဲ့တဲ့ မြန်မာ့ရုပ်ရှင်သမိုင်းဆိုတာ အိပ်ရာဝင်ပုံပြင်လို ဖြစ်နေနိုင်ပါတယ်။

ဒီတော့ တစ်ခေတ်တစ်ခါက ဟောလိဝုဒ်မှာ ရုပ်ရှင်တွေ ဆက်ရိုက်ဖို့ထိ ကမ်းလှမ်းခံခဲ့ရတဲ့ မြန်မာမင်းသမီး ဝင်းမင်းသန်းအကြောင်းကို လက်လှမ်းမီသမျှ တင်ဆက်လိုက်ရပါတယ်။

ထူးတဲ့ ပဲခူးသူ

ဝင်းမင်းသန်းကို လွတ်လပ်ရေးမရခင် ၁၉၃၂ ခုနှစ်၊ နိုဝင်ဘာ ၃၀ ရက် ပဲခူးမြို့မှာ မွေးပါတယ်။ ဖခင်ဖြစ်သူက သယ်သူပို့ဆောင်ရေးဌာနက မန်နေဂျာ ဩစတြေးလျ နိုင်ငံသားဖြစ်ပြီး မိခင်ဖြစ်သူကတော့ မြန်မာအမျိုးသမီးပါ။ အနောက်တိုင်း သွေးတစ်ဝက်နှောသူဖြစ်တဲ့ ဝင်းမင်းသန်းရဲ့ ငယ်နာမည်ကတော့ ဝင်းဝင်းမြင့်ပါ။ အင်္ဂလိပ်နာမည်ကတော့ Helga Johnson ပါ။ ဝင်းဝင်းမြင့်တို့ မိသားစုဟာ မြန်မာနိုင်ငံထဲ ဂျပန်တွေဝင်လာတော့ အိန္ဒိယကို ကို တိမ်းရှောင်ခဲ့ပါတယ်။ အိန္ဒိယမှာပဲ ပညာသင်ခဲ့ပါတယ်။ စစ်ကြီးပြီးတော့ မြန်မာပြည် ပြန်လာပါတယ်။ စိန်ဂျွန်းကွန့်ဗင်မှာ ပညာဆက်ပြီး သင်ယူပါတယ်။ ၁၉၅၁ ရောက်တော့ မိဘနှစ်ပါးရဲ့ ဆန္ဒကြောင့် အင်္ဂလန်ကို သွား၊ လန်ဒန်က Marie Roberts အကသင်တန်းကျောင်းကို တက်ပြီး အကပညာ ဆက်သင်ပါတယ်။ ဒါပေမဲ့ ဝါသနာမပါတာရယ်၊ အကပညာရှင် မဖြစ်နိုင်ဘူးလို့ ထင်တာရယ်ကြောင့် ကျောင်းပြီးတာနဲ့ မြန်မာပြည်ကိုပဲ ပြန်လာခဲ့ပါတယ်။ အနုပညာနဲ့ ဆက်နွယ်တဲ့ ဘယ်အလုပ်ကိုမှ မလုပ်ခဲ့ပါဘူး။

ဒါပေမဲ့ The Purple Plain ရုပ်ရှင်ကိုတော့ မူရင်း ဝတ္ထုကို ကိုယ်တိုင်ဖတ်ဖူးပြီး ကြိုက်လည်း ကြိုက်တာကြောင့် အနုပညာ လှုပ်ရှားမှု ဘာမှ မရှိခဲ့ပေမဲ့ မင်းသမီးလုပ်ဖို့ ဆုံးဖြတ်ခဲ့တာလို့ သူ့အကြောင်းရေးကြတဲ့ စာတွေထဲ တွေ့ရပါတယ်။

ဓာတ်ပုံလေးကအစပြု

အင်္ဂလိပ် စာရေးဆရာ H.E Beates ရဲ့ နာမည်ကျော် ဝတ္ထုဖြစ်တဲ့ The Purple Plain ကို ရုပ်ရှင်အဖြစ် ပြန်ရိုက်ဖို့ ဒါရိုက်တာ Robert Parrish က မင်းသမီးနေရာအတွက် အာရှတစ်ခွင်က လျှောက်ထားသူ မြောက်များစွာထဲကမှ အကြိုက်တွေ့သူကို ရွေးနေချိန်ပါ။

အင်္ဂလိပ် လေတပ်စစ်ဗိုလ်အရာရှိတစ်ဦးနဲ့ မြန်မာမိန်းကလေးတစ်ဦး ကြားက မေတ္တာနှောင်ဖွဲ့မှုကို ဖော်ကျူးထားတဲ့ ဒီရုပ်ရှင်မှာ ဟောလိဝုဒ်ရဲ့ လျှမ်းလျှမ်းတောက် မင်းသားဖြစ်တဲ့ ဂရီဂိုရီပက် က ဇာတ်လိုက်မင်းသားနေရာက သရုပ်ဆောင်မှာပါ။ မင်းသမီးနေရာအတွက် အာရှတစ်ခွင်က သရုပ်ဆောင်အမျိုးသမီး လျှောက်ထားသူ ၂၀၀ ကျော် ရှိပေမဲ့ ဒါရိုက်တာက ဘယ်သူ့ကိုမှ အကြိုက်မတွေ့ဘူးလို့ ဆိုပါတယ်။ အဲဒီအချိန်မှာ ပဲခူးသူ ဝင်းဝင်းမြင့် ရဲ့ ဓာတ်ပုံလေးက ဒါရိုက်တာ Robert Parrish ဆီ ဆိုက်ဆိုက်မြိုက်မြိုက် ရောက်လာပါတယ်။

တီထွင်ဖန်တီးမှုတို့ ပြည့်နှက်ရာ Community Center

မြန်မာနိုင်ငံမှာ လူငယ်တွေအတွက် အလိုအပ်ဆုံးက အလုပ်လုပ်ဖို့၊ စာကြည့်ဖို့၊ သူငယ်ချင်းတွေ၊ လုပ်ဖော်ကိုင်ဖက်တွေနဲ့ ဆုံဖို့ 'သီးသန့်ဆန်တဲ့ နေရာတစ်ခု' ဖြစ်ပါလိမ့်မယ်။ ဒီပြဿနာအတွက် ဖြေရှင်းနည်းက Build Myanmar Community Center မှာ ရှိပါတယ်

Community Center . . .? ဘယ်လိုမျိုးလဲ . . .?

ရေမီးအစုံ၊ အင်တာနက်လိုင်းကောင်းကောင်းနဲ့ ကျယ်ကျယ်ဝန်းဝန်းနေရာ
အလုပ်လုပ်နိုင်မဲ့ Co-working Space
Networking Session တွေ
နယ်ပယ်ပေါင်းစုံက ပညာရှင်တွေရဲ့ Workshop တွေ
အသိပညာရေသောက်မြစ်အတွက် Library နဲ့
တီထွင်ဖန်တီးနိုင်ဖို့ Maker Space တွေ ပါဝင်ပါတယ်။

စိတ်ဝင်စားတယ်ဆိုရင် အောက်ကလင့်ခ်က တစ်ဆင့် အခုပဲ ဝင်လေ့လာကြည့်ပါ။

ဒီကိုနှိပ်ပါ

မိုင်ပေါင်းထောင်ချီပြီး တမျှော်တခေါ် ဝေးလံလှတဲ့ မြန်မာနိုင်ငံက အမျိုးသမီးတစ်ဦးရဲ့ ဓာတ်ပုံဟာ အမေရိကန်က ဟောလိဝုဒ်ရုပ်ရှင်ဒါရိုက်တာဆီ ရောက်လာတာကလည်း ကံတရားတိုက်ဆိုင်မှုလို့ ဆိုရမလား ပါပဲ။

ဝင်းဝင်းမြင့် ရဲ့ ဓာတ်ပုံကို ရိုက်ခဲ့တဲ့ ဓာတ်ပုံဆရာက ဒါရိုက်တာ Robert Parrish ရဲ့ သူငယ်ချင်းပါ။ သူက မြန်မာနိုင်ငံက ဝင်းမင်းသန်းတို့အိမ်ကို အလည်ရောက်တုန်း ဝင်းဝင်းမြင့်ကို ဓာတ်ပုံရိုက်ခဲ့တာပါ။ ကာယကံရှင်ရဲ့ ခွင့်ပြုချက်နဲ့ပဲ ဒါရိုက်တာဆီ ဓာတ်ပုံ ပို့ခဲ့တာပါ။

မြန်မာဆန်ဆန် လှသူတစ်ဦး ဖြစ်တဲ့ ဝင်းဝင်းမြင့်ရဲ့ ဓာတ်ပုံကို မြင်လိုက်တဲ့ ဒါရိုက်တာ Robert Parrish ဟာ သဘောကျလွန်းလို့ Purple Plain ရုပ်ရှင်ရဲ့ ခေါင်းဆောင်မင်းသမီးအဖြစ် ချက်ချင်းရွေးလိုက်ပါတယ်။ သူကိုယ်တိုင်လည်း မြန်မာနိုင်ငံထိ လာပြီး မင်းသမီးလုပ်ဖို့အထိ တိုက်တွန်းပါတယ်။

အဲဒီလိုနဲ့ လျှောက်လွှာလည်းမတင်ရဘဲ၊ တစ်ခါမှလည်း သရုပ်ဆောင်မလုပ်ဖူးဘဲနဲ့ ပဲခူးသူလေး ဟာ ဟောလိဝုဒ်ရုပ်ရှင်ရဲ့ အဓိကဇာတ်ကောင်မင်းသမီး ဖြစ်လာခဲ့ပါတယ်။

ဝင်းဝင်းမြင့်၊ ဝင်းမြင့်သန်း၊ ဝင်းမင်းသန်း

မင်းသမီး ဝင်းမင်းသန်း ရယ်လို့ မဖြင်ခင်အချိန် ပဲခူးသူလေး ဝင်းဝင်းမြင့်ဟာ ရဲဘော်သုံးကျိပ်ဝင် ဗိုလ်စကြာ နဲ့ မေတ္တာမျှကြပါတယ်။ သူတို့နှစ်ဦး တွေ့ကြချိန်မှာ ဗိုလ်စကြာက အသက် ၃၉ နှစ် ရှိပြီး ဝင်းဝင်းမြင့်က အသက် ၂၁ နှစ်ပဲ ရှိပါသေးတယ်။ ပြီးတော့ ဗိုလ်စကြာက ပထမအိမ်ထောင်နဲ့ ကွာရှင်းထားချိန်ပါ။ ပထမအိမ်ထောင်က ဒေါက်တာခင်လှလှဖြစ်ပြီး သူတို့မှာ သူရိန်စကြာ၊ စနီစကြာ၊ တာရာစကြာ ဆိုတဲ့ သားသမီး သုံးဦးလည်း ရှိပါတယ်။ အိမ်ထောင်ရေး အဆင်မပြေမှုကြောင့် ကွာရှင်းပြတ်စဲပြီးတဲ့နောက်မှ ဗိုလ်စကြာနဲ့ ဝင်းဝင်းမြင့် နဲ့ တွေ့ကြတာပါ။

The Purple Plain ရုပ်ရှင်မှာ ဝင်းဝင်းမြင့်ကို မင်းသမီးအဖြစ်ရွေးတော့ သူတို့နှစ်ဦး လက်မထပ်ရသေးပါဘူး။ ရိုက်ကူးရေးကိစ္စနဲ့ ဝင်းဝင်းမြင့် နိုင်ငံခြားထွက်ချိန်မှာ ဗိုလ်စကြာလည်း လိုက်သွားပြီး ရောမမှာ လက်ထပ်ခဲ့ကြပါတယ်။

ဗိုလ်စကြာရဲ့ နာမည် သခင်အောင်သန်းကိုလိုက်ပြီး သူ့နာမည် ဝင်းဝင်းမြင့်ကို ဝင့်မြင့်သန်း လို့ ပြောင်းလိုက်ပါတယ်။ ဟောလိဝုဒ်က ရုပ်ရှင်သတင်းတွေထဲမှာလည်း The Purple Plain ရုပ်ရှင်မှာ ဂရီဂိုရီပက်နဲ့ တွဲဖက်သရုပ်ဆောင်မယ့် မင်းသမီး ဝင်းမြင့်သန်း လို့ ဖော်ပြကြပါတယ်။

ဒါပေမဲ့ သူ့ရဲ့ ဝင်းမြင့်သန်း ဆိုတဲ့ မြန်မာနာမည်ကို ပီသအောင် ခေါ်ဖို့ အခက်အခဲ ရှိလာပြန်ပါတယ်။ ဇာတ်ကား ပရိုမိုးရှင်းအတွက် ကြေညာပေးရမယ့်သူတွေလည်း ဝင်းမြင့်သန်း ဆိုတာကို မှန်အောင် မထွက်နိုင်ကြပါဘူး။

အဲဒါနဲ့ ပရိုဂျူဆာအပါအဝင် ရုပ်ရှင်အဖွဲ့အသားတွေပါ ဝိုင်းဝန်းတိုင်ပင်ကြပြီး နောက်ဆုံး ကာယကံရှင်ရဲ့ ခွင့်ပြုချက်နဲ့ ဝင်းမြင့်သန်း ကနေ ဝင်းမင်းသန်း ရယ်လို့ ဖြစ်လာပါတယ်။

မြေခြားမှာ အခြေတည်လိုက်ရတဲ့ ရုပ်ရှင်

The Purple Plain ရုပ်ရှင်မှာ မူရင်းစာရေးသူက ရွှေဘိုတစ်ဝိုက်၊ ရှမ်းတောင်တန်း၊ မြစ်ဆုံ၊ မူးမြစ် ဒီနေရာတွေမှာ အခြေတည်တာဖြစ်တဲ့အပြင် မြန်မာပြည် မိတ္ထီလာ မှာ တာဝန်ကျတဲ့ ဗြိတိသျှလေတပ် အရာရှိနဲ့ ခရစ်ယာန်ကိုးကွယ်သူ မြန်မာအမျိုးသမီးလေး ကြားက မေတ္တာနှောင်ဖွဲ့မှု အကြောင်းကို ဇာတ်အိမ်တည် ထားတာဖြစ်လို့ ရိုက်ကွင်းကိုလည်း မြန်မာမှာပဲ တည်ဖို့ စီစဉ်ကြပါတယ်။

ဒီရုပ်ရှင်နဲ့ ပတ်သက်ပြီး ဗမာ့ခေတ်အပါအဝင် ပြည်တွင်းသတင်းစာတွေကလည်း ဖော်ပြကြပါတယ်။ ဒါပေမဲ့ နိုင်ငံခြားသားနဲ့ မြန်မာအမျိုးသမီး ချစ်ကြိုက်ကြောင်း ရိုက်ကူးမယ့် ဇာတ်လမ်းဖြစ်လို့ ပြည်တွင်းမှာ ရိုက်ကူးခွင့်မပေးဘူးလို့ဆိုပြီး ပြည်ထဲရေးဝန်ကြီးဌာနကနေ ရိုက်ကူးခွင့် ပိတ်လိုက်ပါတယ်။

အဲဒါကြောင့် ရိုက်ကူးရေးဟာ သိရိလင်္ကာကို ရွှေ့လိုက်ရပါတယ်။ ရုပ်ရှင်ထဲမှာ ဝင်းမင်းသန်းအပါအဝင် အခြား သုံးလေးယောက်ကသာ မြန်မာတွေဖြစ်ပြီး ပါဝင်သမျှက သိရိလင်္ကာနိုင်ငံသားတွေပါ။ စစ်တပ်တည်ရှိရာက ကွင်းပြင်ဖြစ်လို့ နေရာဒေသ သိပ်ကွဲလွဲမှု မရှိပေမဲ့ ဘုရားစေတီပုံတွေနဲ့ လူတွေကြည့်ရင်တော့ မြန်မာ မဟုတ်မှန်း သိသာပါတယ်။ ဗြိတိသျှစစ်သုံးဂျစ်ကားတွေကို လိုက်စီးကြတဲ့ ကလေးလေးတွေကို ကြည့်မယ်ဆိုရင်လည်း မြန်မာကလေးငယ်တွေနဲ့ လုံးလုံးမှ မတူတာကို တွေ့မှာပါ။

မြန်မာမှာသာ ရိုက်ကူးခွင့်ရမယ်ဆိုရင် ဒီရုပ်ရှင်က ပိုပြီးကြည့်ကောင်း ပြည့်စုံသွားမှာပါ။ ပြည်ထဲရေးဝန်ကြီးဌာနရဲ့ အမြင်ကျဉ်းမြောင်းမှုကြောင့် အခွင့်အရေးတစ်ခုက နှမြောစရာကောင်းအောင် ဆုံးရှုံးလိုက်ရပါတယ်။

ခရမ်းရောင်လွင်ပြင်ထဲက မိန်းကလေးအန်နာ

The Purple Plain ရုပ်ရှင်မှာ ဝင်းမင်းသန်းရဲ့ ဇာတ်ကောင်က စစ်ဘေးဒဏ်သင့် ပြည်သူတွေကို ပြုစုစောင့်ရှောက်ပေးတဲ့ ပရဟိတဆေးကုခန်းက သူနာပြုဆရာမလေး အန်နာ အဖြစ်နဲ့ပါ။ ဂရီဂိုရီပက် ကတော့ ညားခါစ ဇနီး စစ်ပွဲမှာ ဗုံးဒဏ်ကြောင့် သေဆုံးသွားခဲ့လို့ စိတ်ဒဏ်ရာရပြီး အိပ်မက်ဆိုးတွေက ခြောက်လှန့်နေသူ ၊ အသည်းကွဲနေသူ ၊ လောကကို ပျင်းရိငြီးငွေ့နေသူ စစ်လေယာဉ်မှူး ဖော်စတာ အဖြစ် ပုံဖော်ထားပါတယ်။

တစ်နေ့တော့ ဖော်စတာရဲ့ သူငယ်ချင်းဖြစ်သူ ဆရာဝန်ဗိုလ်ကြီးက စိတ်ပြေလက်ပျောက်ဖြစ်စေတော့ဆိုပြီး စစ်တပ်နားက ရွာလေးကို ခေါ်သွားပါတယ်။ အဲဒီရွာမှာ အန်နာတို့အဖွဲ့ရဲ့ ဆေးကုခန်းလေး ရှိပါတယ်။ ဆရာဝန်ဗိုလ်ကြီးဟာ အင်္ဂလိပ်လို ကျွမ်းကျွမ်းကျင်ကျင် ပြောနိုင်ကြတဲ့ အန်နာတို့အဖွဲ့နဲ့ ခင်မင်နေပါတယ်။ အဲဒီအဆက်အသွယ်ကြောင့်ပဲ အသည်းကွဲနေတဲ့ ဖော်စတာဟာ အန်နာတို့နေထိုင်ရာ အိမ်လေးဆီ အလည်ရောက်ခဲ့ပါတယ်။

ဖော်စတာ ဟာ အိမ်ရှေ့ ဧည့်ခန်းရဲ့ ကုလားထိုင်ပေါ်မှာ ထိုင်ရင်း မှေးခနဲအိပ်ပျော်သွားပါတယ်။ အိပ်မက်ဆိုးတွေက လန့်နိုးလာချိန် သူ့ဘေးမှာ သံပုရာရည်ခွက်လေးကို ကိုင်ထားတဲ့ မြန်မာအမျိုးသမီးလေးကို တွေ့လိုက်ရပါတယ်။ ခြေဖမိုးထိ ဖုံးအုပ်ထားတဲ့ ထဘီ၊ ရင်ဖုံးအင်္ကျီလက်ရှည် ဝတ်လို့ ဆံပင်ကို နောက်လှန်ပြီး သေသေပ်သပ်သပ်ထုံးဖွဲ့ထားတဲ့ ဆံထုံးကြောင့် ကြည်ရှင်းနေတဲ့ မျက်နှာလေး နဲ့ မြန်မာဆန်ဆန် လှနေတဲ့ ဝင်းမင်းသန်းကို တစ်ကွက်ချင်း အနီးကပ် ရိုက်ပြထားတာဟာ အင်မတန် ကြည့်လို လှခဲ့ပါတယ်။

ဖော်စတာဟာ ဘာစကားမှ မပြောနိုင်ဘဲ ငေးမောကြည့်နေရသလို ရုပ်ရှင်ကြည့်ပရိသတ်တွေဟာလည်း ဝင်းမင်းသန်းရဲ့ အလှမှာ ခဏတော့ မိန်းမောသွားမိကြမှာပါပဲ။ ဂရီဂိုရီပက်ရဲ့ ခန့်ညားတဲ့သွင်ပြင်နဲ့ ဝင်းမင်းသန်းရဲ့ ကျက်သရေရှိလွန်းတဲ့ အလှကြောင့် ရုပ်ရှင်ဟာ တကယ်ပဲ လှပလွန်းခဲ့ပါတယ်။

တစ်ကြိမ်တစ်ခါမှ သရုပ်ဆောင် မလုပ်ခဲ့ဖူးတဲ့ ဝင်းမင်းသန်းဟာ ဝါရင့်သရုပ်ဆောင် ဂရီဂိုရီပက်နဲ့ တွဲဖက်ပြီး အပိုအလိုမရှိ သရုပ်ဆောင်ပြနိုင်ခဲ့ပါတယ်။ ရိုးသားတဲ့ မြန်မာမိန်းကလေးအဖြစ်၊ စိတ်က ဖော်စတာကို တိမ်းညွတ်နေပေမဲ့ နိုင်ငံခြားသားဖြစ်လို့ မယုံမရဲဖြစ်နေရသူအဖြစ်၊ ဖော်စတာရဲ့ စိတ်ဒဏ်ရာတွေကို ကယ်ဆယ်ဖေးမသူ သူနာပြုဆရာမလေး အန်နာ အဖြစ် ကောင်းကောင်းကြီး သရုပ်ဆောင်ပြနိုင်ခဲ့ပါတယ်။

ဟောလိဝုဒ်က ထုတ်လုပ်တဲ့ ရုပ်ရှင်ဖြစ်ပေမဲ့ သူတို့နှစ်ဦးဟာ သာမန်ဖက်ပွေ့မှုကလွဲပြီး နှုတ်ခမ်းကိုနမ်းတဲ့ ချစ်ခန်းလေးတစ်ခန်းတောင် မပါခဲ့ပါဘူး။ ဘာကြောင့် ချစ်ခန်းမပါရသလဲဆိုတဲ့ အကြောင်းဟာ ရယ်ချင်စရာလည်း ကောင်းသလို အိန္ဒြေကြီးလှတဲ့ မြန်မာမင်းသမီး ဝင်းမင်းသန်းရဲ့ ချစ်စရာကောင်းတဲ့ အတွေးလို့လည်း ပြောလို့ရပါတယ်။ ဒီအကြောင်းကို ဂရီဂိုရီပက်ကိုယ်တိုင် ရုပ်ရှင်ဆောင်းပါးအဖြစ် ပြန်ရေးပြခဲ့ပါတယ်။

ကြည်သွန်ဖြူ မင်းသမီး

အင်္ဂလိပ်စကားလို တကယ့်ပီဘိ အင်္ဂလိပ်တစ်ယောက်လို ပြောနိုင်သူ၊ ဖော်ရွေလှသူ၊ လှပကျော့ရှင်းပြီး အဆင့်အတန်းမြင့်သူ၊ သရုပ်ဆောင် အရည်အသွေးကောင်းရှိသူ ဝင်းမင်းသန်းမှာ ခြွင်းချက်တစ်ခု ရှိနေပါတယ်လို့ ဂရီဂိုရီပက်က ပြောပါတယ်။ အဲဒါကတော့ ကြည်သွန်ဖြူ နံ့ပါတဲ့။ လူကိုမမြင်ရသေးခင် ကြည်သွန်ဖြူနံ့က အရင်ရှေ့ရောက်ပါတယ်လို့ ဂရီဂိုရီပက်က ရေးထားပါတယ်။

တစ်ခါသား ဗုံးကြဲလေယာဉ်တွေ လာချိန် ခေါင်းကို ဗုံးမထိအောင် မျက်နှာနဲ့ ကာပေးရတဲ့ ဇာတ်ဝန်းခန်း ရိုက်ရတော့ ကြက်သွန်ဖြူနံ့ကို ဘယ်လိုမှ သည်းမခံနိုင်လွန်းလို့ ရိုက်ကွင်းကို ရပ်ခိုင်း ဖျက်ခိုင်းရပါတယ်တဲ့။ အော်ဂလီဆန်စရာကောင်းလိုက်အောင် ဆိုးရွားပေမဲ့ ထုတ်ဖော်ပြောလိုက်ရင်လည်း အရှက်ရသွားမှာ စိုးတာကြောင့် အောင့်အည်းပြီးသာ နေခဲ့ရတယ်လို့ ပြောပါတယ်။

ရိုက်ကွင်းမရှိချိန် အာလာပသလာပ ပြောကြဆိုကြတဲ့ အခါမှာတော့ အဲဒီ ကြက်သွန်ဖြူနံ့ကို လုံးလုံးမရလို့ အံ့ဩရပါတယ် တဲ့။ ဘယ်လိုပဲ အားစိုက်ပြီး အနံ့ခံကြည့်ကြည့် လုံးဝ ကို မရတဲ့အခါ တစ်ခုခုတော့ ထူးခြားနေပြီမှန်း သိလိုက်လို့ အရဲစွန့်ပြီး ပွင့်ပွင့်လင်းလင်း မေးကြည့်တဲ့အခါ ဝင်းမင်းသန်းဟာ ရဲရဲပွင့်လင်းသူဖြစ်လို့ အဖြေမှန်ကို ပြောပါတယ်။

Enjoyed the Content? Click to donate us!

အဲဒါကတော့ သူ့ရဲ့နှုတ်ခမ်းကို အနမ်းမခံချင်လို့ ရိုက်ကွင်းလာတိုင်း ကြက်သွန်ဖြူကို အစိမ်းလိုက် ဝါးစားခဲ့တာ ပါတဲ့။ ကောက်ကာငင်ကာကြီး မင်းသမီးဖြစ်လာသူမို့ ဝင်းမင်းသန်းဟာ ဇာတ်ညွှန်းကိုလည်း မဖတ်ထားရပါဘူး။ မူရင်း ဝတ္ထုထဲမှာ ချစ်ခန်းကြိုက်ခန်းများ ပါတာကြောင့် ကြိုတင်ကာကွယ်တဲ့အနေနဲ့ ကြက်သွန်ဖြူတွေ စားခဲ့တာပါလို့ ဝန်ခံပါတယ်။

အဲဒီတော့မှ ဂရီဂိုရီပက်လည်း သဘောပေါက်သွားပြီး “ Don’t worry baby there is no lip kiss in the script” ဆိုပြီး နှစ်သိမ့်ကာ ရုပ်ရှင်ကို ကြက်သွန်ဖြူနံ့ကင်းစွာနဲ့ ရှေ့ဆက်နိုင်ခဲ့ပါတယ် တဲ့။

ဟောလိဝုဒ်နှင့် ထမီရင်ရှား

The Purple Plain ရုပ်ရှင် အောင်မြင်သွားတော့ ဝင်းမင်းသန်းလည်း နေ့ချင်းညချင်း ဟောလိဝုဒ်မှာ နာမည်ကြီးသွားပါတော့တယ်။ နောက်ထပ် ရုပ်ရှင်တွေရိုက်ဖို့အထိ ကမ်းလှမ်းခံလာရပါတယ်။ ဒါပေမဲ့ ဝင်းမင်းသန်းက ဟောလိဝုဒ် ရုပ်ရှင်အသိုင်းအဝိုင်းနဲ့ မြန်မာ့ယဉ်ကျေးမှုနဲ့ အံမဝင်ပါဘူး ပြီးတော့ သူကိုယ်တိုင်ကလည်း အိမ်ထောင်ရှင်သာမာန် အမျိုးသမီးအဖြစ်သာ နေထိုင်ချင်ပါတယ် လို့ဆိုပြီး ကမ်းလှမ်းသမျှကို ယဉ်ယဉ်ကျေးကျေး ငြင်းပယ်ခဲ့ပါတယ်။

သူကိုယ်တိုင် သရုပ်ဆောင်ထားတဲ့ ဇာတ်ကား ကြော်ငြာဖို့အတွက် ကိုယ်လုံးပေါ် အလှဓာတ်ပုံရိုက်ဖို့ ရေကူးကန်မှာ ရေကူးဝတ်စုံနဲ့ ဓာတ်ပုံရိုက်ဖို့ စီစဉ်တာကိုတောင် အကြောက်အငန် ငြင်းဆန်ခဲ့သူပါ။ နောက်ဆုံး ဝိုင်းဝန်းဖြောင်းဖျကြတဲ့အခါ ရေကူးဝတ်စုံတောင် မဝတ်ပါရစေနဲ့ ၊ မြန်မာ့နည်းမြန်မာ့ဟန် ထမီရင်ရှား နဲ့သာ ရိုက်ပါရစေ ဆိုတာကြောင့် ရေကူးကန်မှာ ထမိန်ရင်ရှားနဲ့ ရိုက်ခဲ့သူအဖြစ် ထူးထူးခြားခြား မှတ်သားခံခဲ့ရသူပါပဲ။

ပြည်တော်ပြန်

ဟော်လိဝုဒ်မှာ ရုပ်ရှင်ရိုက်ဖို့ ငြင်းဆန်ပြီး မြန်မာနိုင်ငံ ပြန်လာတော့လည်း ဒီက ရုပ်ရှင်အသိုင်းအဝိုင်းက ရုပ်ရှင်ရိုက်ဖို့ ကမ်းလှမ်းကြပြန်ပါတယ်။ ဒါပေမဲ့ ဝင်းမင်းသန်းဟာ မြန်မာ့ရုပ်ရှင်ရပ်ဝန်းမှာလည်း သရုပ်ဆောင်လုပ်ဖို့ကို ငြင်းပယ်ခဲ့ပါတယ်။ ဗိုလ်စကြာနဲ့ ဇနီးအဖြစ်နဲ့သာ ရိုးရိုးရှင်းရှင်း နေထိုင်သွားခဲ့ပါတယ်။

ဒါပေမဲ့ ဘဝအလှည့်အပြောင်းက ဖြစ်လာပြန်ပါတယ်။ ၁၉၆၂ ဗိုလ်ချုပ်နေဝင်း အာဏာသိမ်းတော့ ဗိုလ်စကြာကို ဦးနုနဲ့ ပေါင်းပြီး လက်နက်ကိုင်တော်လှန်မှုနဲ့ ပတ်သက်တယ်ဆိုတာကြောင့် သူတို့တွေ ထိုင်းကို ထွက်ပြေးတိမ်းရှောင်ခဲ့ရပါတယ်။ ဗိုလ်စကြာဟာ ၁၉၆၉ မှာ နှလုံးရောဂါနဲ့ ထိုင်းနိုင်ငံမှာ ကွယ်လွန်ခဲ့ပါတယ်။ အဲဒီလိုနဲ့ ဝင်းမင်းသန်းဟာ အသက် ၃၇ နှစ်မှာပဲ မုဆိုးမ ဖြစ်သွားပါတော့တယ်။ အာကာစကြာဆိုတဲ့ သားတစ်ဦး ကျန်ခဲ့ပါတယ်။ နောက်တော့ သားဖြစ်သူနဲ့အတူ ဩစတြေးလျ ကို အပြီးတိုင်ပြောင်းရွေ့ခဲ့ပြီး အခုထိတိုင် နေထိုင်နေပါတယ်။

ဝင်းမင်းသန်းဟာ မြန်မာရုပ်ရှင်သမိုင်းအတွက် မှတ်တိုင်တစ်ခု ဖြစ်ပေမဲ့ မြန်မာ့ရုပ်ရှင်မှာ သူ့နေရာကတော့ မှေးမှိန်လွန်းပါတယ်။ ဝင်းမင်းသန်းလို့ ဆိုလိုက်တာနဲ့ တစ်ခေတ်တစ်ခါက မြန်မာ့ရုပ်ရှင်နဲ့ မြန်မာနိုင်ငံရဲ့ အဆင့်အတန်း မြင့်မားခဲ့တာကိုပါ မှန်းဆကြည့်လို့ရပါတယ်။

မြန်မာရုပ်ရှင်မျိုးဆက်မှာ နောက်ထပ် ဝင်းမင်းသန်း တွေ ပေါ်လာဦးမလားဆိုတာကတော့ စောင့်မျှော်ကြည့်ရဦးမှာပါပဲ .... ။

နုသစ်မိုး(Y3A)

Build Myanmar-Media : Insights | Empowering Myanmar Youth, Culture, and Innovation

Build Myanmar-Media Insights brings you in-depth articles that cover the intersection of Myanmar’s rich culture, youth empowerment, and the latest developments in technology and business.